الحجر الاسود
كرويات الصبر البيضاء
اتلمت وغمت وغزت اجسادك
وبتا تهضرب
فى هضريبك امور تعزيبك
بين النخلة ومجرى النسمة
اتساقط طائر
فتفت وحتحت ريشو قصادك
وكان دا حبيبك وقمتا تجقلب
بين القيفة وباب النهر
دبيب الريح من دبش القهر
اتلوى اتلبد ولدغ الشيمة
الشيمة انكفت البحر انخجا
الذبد انعجا الطين انحترب
مرقت عقرب ورفعت شارة
اندفعت فارة تجاه المركب
وقعت سارا على صنقور
رواسى قريبك
وقام متوهدب وكابسو الجندب
وكان دى امجادك
بين الميدنا والارصاد انجرحت
غيمة الغيمة الطيبة الحاملة حلال
من الق البسمة الفى الاطفال
من عرق النسمة الفى العمال
والناس الفال انسرحت شظايا
اذان الوقت الواقع بين تعزيبك
وسرقة زادك
مدت ايدك تالا القبلة طشاشا
يعيبك
تسبى نديهتك تفقد جيهتك
تنزف تنسف دانات داعات ..الهوس الدينى..الطينى..الجينى
قوافل اورادك تركض تالا جنازتك...ونعش اولادك
تهتف تغضب تلقى قصادك
سد ترابى كور همباتة
لحى.. نخاصة وكل الساسة
الباعو نصيبك باستشهادك
عاد ان شاء الله تكون الجنة
الماهلة ميعادك
الا الحاصل ديل حسادك
بعض يقول الله لا عادك
وبعض ان لاقى طريقة يجيبك تانى
عشان الموت يصطادك
يا مجلوب فى السوق الاخرى
ويا متمقلب تحت جهادك
فر جوادك مات الطائر
وكرش الغيمة انبعجت طمت
تقدرتكشر حمرة عينك
تنكش سيفك تابى جفيرك
دابك تقوى يا بنى ادم
تفقد مرة مريرة ضميرك
تكسب ثروة
وتلقى العالم تحت سريرك
تروى وترضع زاتك من لذاتك
وحلو الحلوة مما تبلع
يوت تضرع تسال ربك
يمسح سفكك يغفر زنبك
خيرات شعبك اصلها كانت
عترة فى دربك
لما تعبتا وخانك حزبك
كانت هفوة فى لحظة سهوة
عن الانسان والحال الاسوى
ودابك فقتا وجاتك نخوة
وجيت تتكفر
يارب اغفراغفر عبدك خاسر
شئ ما بسوى
وين السطوة الجشع القسوة
يا متلبك فى الادران الحجر الاسود
ماهو البروة
وماها مكاوى الكعبة حين ينكرفس توب التقوى
والمشروع الدينى الخالص
ما محتاج لدراسة جدوى
وما فى خرط للجنة تودى
وما فى خطط ممهودة برشوة
يا من قال يارب من قلبو
رد الخالق دائما ايوة
لف بشكيرك فوق الراس
النشف غيرك ما تستهوى
واعلم انو سقطت
مع انك واقف فوق اسمنت
وتحتك عملة وهم واقفين
فى البرد الناشف وجاهم زاحف
قوز الرملة الاملاق العيش
الشاظف
فى ظلمات الذمن العاصف
قاسى عبور اليم يا نملة
واسى غلابة الدنيا الكت
بتتعب غنية عشان يرتاحو
الكجنو حنك
وصارو نفيرك وقت حصادك
وكان يجاروا عليك من دون ما تنادى
بارى نصيبك هرب خيرات بلدك برا
سيبك باوعية البلد القطت
ما يشفيك اليم النقط الا الدم
البداء يلقط واحد واحد
يا مجلوبة فى وضع خريف
بين راكوبة وحوش وصريف
سوس مرقو وسقفو يناهد
احسن بى كفى وكفك
نضارى الطفل الواعد
من تخويف تسويف موزيف
نلقى الوطن الحلم مو الطارد
والله الموت الدغرى الواحد....