ذى دم البشرى الوديع
احمد القرشى وصحابو
هاشم الواضح حبابو
ذى دم المحجوب وجوزيف
طيب العشرة الشفيع
سيدى المحمود مشاعر
امنا الطفلة وجميع
ما انعكس بالريح ترابو
رشا بى دمو ودموعو
دقا بى ضمة ضلوعو
حين سقط بالنار صريع
فيهو ما استكتر شبابو
ولا تعذر بى عقابو
ولا حسب للموت حسابو
لاقاهو فى غبطة وشجيع
دمو كان عربون لدمك ودم جايى
همو عاش انسانى همك للنهاى
يا زبون الشارع الما بيرضى ظلمك
وعزمو عزمك يا هوايا
خوفى يا منبت فى حلمك
فينا من ينبتلو نجمك
خوفى فى كل الربيع
ما نلقى نمسك وننسى رسمك
حتى اسمك يا بديع
يا كوان اهلو الفقارى
ونارها فى البرد الصقيع
يا ملازهم يا وجيع
راحة المشتاق لضمك
وانت زولك مستطيع
خوفى يا على يا ابن امك
خوفى دمك من يضيع
ايوة يا اطهر عريس
يا وريث كل الشرائع
والشعائر والطقوس
انت سدا لام مواكب
المناكب فى المناكب
القطارات
المطارات
البحارات المراكب والصحارى
كرنفالات المدارات
مهرجانات المراكب
والفقارى بالفرح زى السكارى
العصى الصقرية والسوط
والمواويل والزغاريد
البلاليل المناديل التاشر
خوفى من مرضى النفوس
الاباليس النجوس
الجواسيس اللصوص
يشغلوك بالقرمصيص
ولما تبرى الدارة با ابشر
هم يخطفو العروس
لافرحك يزفر نورك المشرق بصيص
من سمح محياك ينفر حافى جائع
دون قميص
فى زحام سوقات تدفر من بعد سيرة ورقيص
او تكاد تشبه غناى البائس الرث الرخيص
البالى والمهزوم معاى لما انت تروح فطيس
العديل والزين مقطم بى ضريرتو الحق محطم
والوتر خانس تعيس
الطيور شدرن يبس
كل فرع ساوالا ميتم
وانت زولك مستطيع
خوفى يا على يا ابن
امك
خوفى دمك من يضيع
خوفى من غفلتنا اكتر
ونحنا عزل
محض محضر
بعض منشور عرض بوستر
او قصائد جوة دفتر
الوتر بينن مدردر
ميكرفونات صوت مودر
فى زمن لاهوت وعسكر
وانت زولك مستطيع
خوفى يا على يا ابن امك
خوفى دمك من يضيع
وخوفى من عزلتنا عنو
شعبنا الانسانى ظنو
والتعالى الماهو منو
خوفى اكثر من تواصل خطو يفتر
خوفى عزرا يا حبيبنا دياالكتيك مدجل
سيل ضجيج الايدولوجيا اللافى والليل المهرجل
نهجا بالتسامح والتصالح والتصافح
الصراع ذى المؤجل...........
....مع حبى.. له بقية
،،، وتمنياتنا لهم مزيدااااا من الابداع
موضوع: ذي دم البشرى الجديد 